‘मराठी लोक मराठी लोकांचेच पाय ओढतात’ ही समजूत आत्ता ‘आमी परिवार ग्लोबल’ या आंतरराष्ट्रीय स्तरावर सामाजिक कार्य करणाऱ्या सोशल ग्रुपने खोडून काढली आहे.

अमेरिका, कॅनडा, यूके, केनिया, जॉर्जिया, इजिप्त,अरब राष्ट्रांमधील दुबई, अबुधाबी, शारजाह, अजमान, रस अल खैमाह, अल ऐन, फुजेराह, उम अल क्वेन, तसेच कतार, बहारीन, सौदी अरेबिया, ओमान या आखाती देशांमध्ये नोकरी-धंद्यानिमित्त जेव्हा आपले मराठी बांधव येतात तेव्हा योग्य मार्गदर्शनाअभावी त्यांना अनेकदा अडचणींचा सामना करावा लागतो. तसेच कित्येक होतकरू मराठी तरुण, परदेशातील नोकरीपर्यंत पोहचू शकत नाहीत.

ही सर्व परिस्थिती पाहता ‘आपल्या मराठी बांधवांसाठी काहीतरी करायला हवं’ असा विचार सतत माझ्या मनात घोळत होता. अणि अशातच मी दुबईमध्ये नोकरीस असताना एकेदिवशी मला, आपण व्हॉट्सॲप ग्रुपच्या माध्यमातून आपल्या परदेशस्थ मराठी बांधवांना समाजप्रेमाच्या एका धाग्याने गुंफू शकतो, ही कल्पना सुचली अन् २९ मार्च २०१६ रोजी 'आमी परिवार ग्लोबल' चा पहिला व्हॉट्सॲप ग्रुप तयार करण्यात आला. आणि बघता बघता दोन वर्षात ह्या इवल्याशा रोपट्याचे वटवृक्षात रुपांतर झाले.